អ្នកគ្រូ កែវ វណ្ណា អាយុ ៤២ឆ្នាំ នាយិកាសាលាបឋមអូរដេកា ស្ថិតក្នុងភូមិអូរដេកា ឃុំប្រម៉ោយ ស្រុកវាលវែង ខេត្តពោធិ៍សាត់ បានស្លាប់បាត់បង់ជីវិតទាំងកូន នៅក្នុងផ្ទៃជិតគ្រប់ខែទៅហើយ ដោយសារតែជំងឺថប់ដង្ហើម នាម៉ោង៥៖១០នាទីព្រឹក ថ្ងៃទី១៥ ខែមីនា ឆ្នាំ២០១៦នេះ ពេលដឹកបញ្ជូនមកសង្រ្គោះនៅមន្ទីរពេទ្យបង្អែក ។
ក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង ក្នុងនាមជាប្រធានកិត្តិយសសាខាកាកបាទក្រហមកម្ពុជាខេត្ត ឯកឧត្តម ម៉ៅ ធនិន បានផ្តល់ថវិកា ២លានរៀលដល់ក្រុមគ្រួសារសព ដើម្បីចាត់ចែងធ្វើបុណ្យតាមប្រពៃណី ។ ឯកឧត្តមអភិបាលខេត្ត ក៏បានចាត់ចែង ឲ្យក្រុមការងារសាខាកាកបាទក្រហមខេត្តពោធិ៍សាត់ និង អនុសាខាកាកបាទក្រហមស្រុក ចុះជួយសម្រាលទុក្ខលំបាករបស់គ្រួសារ សពដល់គេហដ្ឋានក្នុងភូមិអូរដេកា ឃុំប្រម៉ោយ ស្រុកវាលវែង ខេត្តពោធិ៍សាត់ផងដែរ ។
គួររំលឹកផងដែរថា គ្រួសារជនរងគ្រោះ បានទំនាក់ទំនងមក ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ ខណៈពេលដែលប្រពន្ធរបស់គាត់មានអាក្ការៈមិនសូវស្រួល ភ្លាមៗនោះឯកឧត្តមបានអញ្ជើញមកសួរសុខទុក្ខដោយផ្ទាល់ នៅមន្ទីរពេទ្យបង្អែកពោធិ៍សាត់ តែជាអកុសលស្ត្រីរងគ្រោះបានដាច់ខ្យល់មុនពេលមកដល់មន្ទីរពេទ្យបង្អែកបាត់ទៅហើយ ។ នេះសបញ្ជាក់ឲ្យឃើញថា ឯកឧត្តម ម៉ៅ ធនិន តែងតែចុះជួយដោះស្រាយទុក្ខលំបាកដោយផ្ទាល់ ទៅតាមសំណូមពរបស់ប្រជាពលរដ្ឋ ៕
