សមាគមរ៉ូតារីពោធិ៍សាត់ បានធ្វើការសហការជាមួយ សមាគមរ៉ូតារីសិនតូសា (Sentosa) ប្រទេសសិង្ហបុរី បានផ្តល់កង់ដល់សិស្សានុសិស្សក្រីក្រ ចំនួន ៧០០កង់ និង ចែកកញ្ចប់សម្ភារសិក្សា ចំនួន ១៧០០កញ្ចប់ ដល់សិស្សានុសិស្សមកពី ៥០សាលា មកពី ០៥ក្រុង/ស្រុក (ស្រុកកណ្តៀង ស្រុកភ្នំក្រវាញ ស្រុកបាកាន ស្រុកក្រគរ និង ក្រុងពោធិ៍សាត់) ក្នុងខេត្តពោធិ៍សាត់ ។
ពិធីនេះបានប្រារព្ធធ្វើឡើង នៅបរិវេណស្ថានីយ៍ទូរទស្សន៍ ទទក ពោធិ៍សាត់ នារសៀលថ្ងៃទី ១៥ ខែ មករា ឆ្នាំ ២០១៦ ក្រោមអធិបតីភាព ឯកឧត្តម ខូយ រីដា អភិបាលរងនៃគណៈអភិបាលខេត្ត តំណាង ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និង លោក Philip Chong អភិបាលតំបន់ ៣៣១០ មកពីប្រទេសសិង្ហបុរី ។
ឯកឧត្តម ខូយ រីដា អភិបាលរងនៃគ ណៈអភិបាលខេត្ត តំណាង ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានថ្លែងអំណរគុណ ដល់សមាគមរ៉ូតារីសិនតូសា (Sentosa) ប្រទេសសិង្ហបុរី ដែលបានជួយឧបត្ថម្ភកង់ និង សម្ភារសិក្សាដល់សិស្សានុសិស្សក្រីក្រ ក្នុងខេត្តពោធិ៍សាត់ ។ ជាមួយគ្នានោះ លោកក៏បានផ្តាំផ្ញើដល់សិស្សានុសិស្ស ពេលបានទទួលសម្ភារទាំងនេះត្រូវចេះថែរក្សាឲ្យបានល្អ និង ត្រូវខិតខំរៀនសូត្រ ។
ឯកឧត្តម បានបន្តទៀតថា សូមក្មួយៗទាំងអស់ ពេលធ្វើដំណើរ ត្រូវចេះគោរពច្បាប់ចរាចរណ៍ និង ត្រូវជៀសឲ្យផុតពីគ្រឿងញៀន ដើម្បីក្លាយខ្លួន ជាកូនល្អ សិស្សល្អ មិត្តល្អ និង ជាទំពាំងស្នងឬស្សីទៅថ្ងៃអនាគត ៕
