ឯកឧត្តម ម៉ក់ រ៉ា អភិបាលរងនៃគណៈអភិបាលខេត្ត តំណាងដ៏ខ្ពង់ខ្ពស់ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានថ្លែងថា ៖ ទឹក ក៏ដូចជាដី គឺតម្រូវការចាំបាច់ របស់ប្រជាពលរដ្ឋមិនអាចខ្វះបាន ដូច្នេះហើយទាមទារឲ្យបងប្អូនប្រជាពលរដ្ឋនៃឃុំស្រែស្តុកទាំងមូល ចូលរួមសហការគ្នា ស្តារបឹងទន្លេអុំឡើងវិញ ។ ជាក់ស្តែងប៉ុន្មានឆ្នាំចុងក្រោយនេះ នៅប្រទេសមួយចំនួន រួមមានប្រទេសកម្ពុជាផងដែរ ក៏បានជួបគ្រោះរាំងស្ងួត ជាពិសេសក្នុងឆ្នាំ២០១៦នេះតែម្តង ដែលអូសបន្លាយរយៈពេលយូរ នេះបើតាមការព្យាករណ៍ របស់ក្រសួងធនធានទឹក និង ឧត្តមនិយម បានប្រកាសកាលពីដើមឆ្នាំ ២០១៦ ។
ការថ្លែងបែបនេះ ក្នុងឱកាសដែលឯកឧត្តម អញ្ជើញជាអធិបតី ក្នុងពិធីបុណ្យឆ្លងកាត់ខ្សែបូបង្គោលព្រំប្រទល់ និង ស្តារបឹងទន្លេអុំឡើងវិញ នាព្រឹកថ្ងៃទី ០២ ខែ មីនា ឆ្នាំ ២០១៦ នៅបរិវេណបឹងទន្លេអុំ ក្នុងភូមិបាគូ ឃុំស្រែស្តុក ស្រុកកណ្តៀង ខេត្តពោធិ៍សាត់ ។ ដោយមានការអញ្ជើញចូលរួមពី លោក ឡាច ផេងលី ប្រធានមន្ទីរវប្បធម៌ និង វិចិត្រសិល្បៈខេត្ត លោក ផាយ ឡេង អភិបាលស្រុកកណ្តៀង លោកស្រី ឡូវ សំណាង នាយិកាអង្គការអភិវឌ្ឍន៍នារីខ្មែរ (ANKO) លោកគ្រូ អ្នកគ្រូ សិស្សានុសិស្ស និង បងប្អូនប្រជាពលរដ្ឋ ប្រមាណ ៧០០នាក់ផងដែរ ។
ក្រោយពីពិធីបុណ្យឆ្លងកាត់ខ្សែបូបង្គោលព្រំប្រទល់ ក៏មានពិធីរាប់បាត ប្រគេនព្រះសង្ឃចំនួន ៦០អង្គ ដែលនិមន្តមកពីវត្តចំនួន ៤ ក្នុងស្រុកកណ្តៀង មានវត្តក្តីឧត្តម វត្តបន្ទាយត្រោក វត្តព្រះធាតុ និង វត្តសែនជ័យផងដែរ ៕
