ក្រសួងការងារ និង បណ្តុះបណ្តាលវិជ្ជាជីវៈ នៅព្រឹកថ្ងៃទី១៤ ខែមីនា ឆ្នាំ២០១៦នេះ បានរៀបចំវគ្គបណ្តុះបណ្តាល ស្តីពី ”ការពង្រឹងសមត្ថភាព ក្នុងការដោះស្រាយវិវាទការងារ ការទប់ស្កាត់ និង ដោះស្រាយ បញ្ហាកូដកម្ម បាតុកម្ម” នៅសាលប្រជុំសាលាខេត្តពោធិ៍សាត់ ក្រោមវត្តមាន ឯកឧត្តម ពេជ សោភ័ន រដ្ឋលេខាធិការ ក្រសួងការងារ និង ជាតំណាងឲ្យ ឯកឧត្តម អ៊ិត សំហេង រដ្ឋមន្ត្រីក្រសួងការងារ និង បណ្តុះបណ្តាលវិជ្ជាជីវៈ និង ជាគណៈកម្មការដោះស្រាយបញ្ហាបាតុកម្ម និង កូដកម្ម នៅគ្រប់មុខសញ្ញា, ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និង មានការអញ្ជើញចូលរួមពីមន្ត្រីរាជការ កងកម្លាំងប្រដាប់អាវុធទាំង៣ប្រភេទ ប្រធានមន្ទីរអង្គភាពនានាជុំវិញខេត្ត សរុបប្រមាណ ២០០នាក់ ។
វគ្គបណ្តុះបណ្តាលនេះ មានគោលបំណង ដើម្បីបង្កើនសមត្ថភាពដល់មន្ត្រី ក្នុងការដោះស្រាយវិវាទការងារ និង ទប់ស្កាត់ និង ដោះស្រាយបញ្ហាកូដកម្ម បាតុកម្ម ឲ្យបានទាន់ពេលវេលា និង មានប្រសិទ្ធភាព ។
