ឯកឧត្តម ម៉ៅ ធនិន អភិបាលនៃគណៈអភិបាលខេត្ត និង ជាប្រធានក្រុមប្រឹក្សាប្រឡងប្រណាំង អនុវត្តគោលនយោបាយ ភូមិ ឃុំ មានសុវត្ថិភាពខេត្ត មានប្រសាសន៍ថា ឃុំ សង្កាត់ ទាំង៤៩ ក្នុងខេត្តពោធិ៍សាត់ បានជាប់ចំណាត់ថ្នាក់ ក្នុងការប្រឡងប្រណាំង អនុវត្តគោលនយោបាយ ភូមិ ឃុំ មានសុវត្ថិភាព ឆ្នាំ២០១៥កន្លងមក គឺចំណាត់ថ្នាក់លេខ១ មាន១០ ទទួលបានប័ណ្ណសរសើរ និង អមដោយថវិកា មួយលានរៀល លេខ២ ចំនួន២៦ ទទួលបានលិខិតសរសើរ អមដោយថវិកា ៦៥ម៉ឺនរៀល និង លេខ៣ មាន១៣ ទទួលបានលិខិតសរសើរ និង អមដោយថវិកា ៤៥ម៉ឺនរៀល ក្នុងមួយឃុំ សង្កាត់ ។ ដោយបញ្ជាក់ថា ប្រសិទ្ធិភាពគោលនយោបាយ ភូមិ ឃុំ មានសុវត្ថិភាព បច្ចុប្បន្ននេះ បានក្លាយទៅជាចលករ ក្នុងការលើកកម្ពស់ស្ថានភាព សន្តិសុខសណ្តាប់ធ្នាប់សាធារណៈកាន់តែប្រសើរ តាមរយៈការកសាងផែនការប្រើប្រាស់កម្លាំងសរុប និង មធ្យោ បាយសរុប ខិតខំប្រឹងប្រែងចូលរួមសហការ ពីគ្រប់អាជ្ញាធរ និង មន្ត្រីនគរបាលប៉ុស្តិ៍រដ្ឋបាល ឃុំ សង្កាត់ បាន វិវត្តសកម្មភាពបទល្មើស ជាទូទៅត្រូវបានកាត់បន្ថយជាបន្តបន្ទាប់ ។
នេះគឺជាការលើកឡើងរបស់ ឯកឧត្តម ម៉ៅ ធនិន នៅក្នុងកិច្ចប្រជុំបូកសរុបការងារប្រចាំឆ្នាំ២០១៥ និង លើកទិសដៅអនុវត្តឆ្នាំ២០១៦ នាព្រឹកថ្ងៃទី ០៣ ខែ ឧសភា ឆ្នាំ ២០១៦ នៅសាលប្រជុំសាលាខេត្ត ។
