នៅរសៀលថ្ងៃទី២៧ ខែកក្កដា ឆ្នាំ២០១៦ នេះ ក្រោយពេលអញ្ជើញវិលត្រឡប់មកពីពិនិត្យការដ្ឋានសាងសង់ទំនប់វារីអគ្គិសនីសេសានក្រោម២ នៅខេត្តស្ទឹង ត្រែងរួចហើយ សម្តេច តេជោ ហ៊ុន សែន បានអញ្ជើញបន្តដំណើរឆ្ពោះមកកាន់ខេត្តក្រចេះជាបន្តទៀត ដើម្បីជួបសំណេះសំណាលជាមួយមន្រ្តី្តរាជការផង និង បន្តពិនិត្យសមិទ្ឋផលនានា និងដោះស្រាយបញ្ហាប្រឈមមួយចំនួនជូនប្រជាពលរដ្ឋផងដែរ។
ជានិច្ចជាកាល ពេលអញ្ជើញធ្វើដំណើរឆ្លងកាត់ខេត្តក្រចេះ សម្តេចតេជោ តែងតែឈប់ចូលថ្វាយបង្គំព្រះសង្ឃ និងព្រះគ្រូរបស់ សម្តេច នៅវត្តបុស្សមាលី ហៅវត្តបុសលាវ ស្ថិតនៅក្នុងភូមិ បុសលាវ ឃុំបុសលាវ ស្រុក ចិត្របុរី ខេត្តក្រចេះ។ សម្តេចតេជោ បានឈប់នៅទីអារាមនេះ ហើយបានប្រារព្ឋពិធីបុណ្យបង្សុកូលប្រគេនជូនព្រះគ្រូធម្មាចារ្យ គឹម ច្រែង ដែលជាព្រះគ្រូបីបាច់ថែរក្សាសម្តេចតេជោផ្ទាល់កាលពីសម្តេចនៅវ័យកុមារសិក្សារៀនសូត្រនៅវត្ត។ ព្រះគ្រូ គឹម ច្រែង បានទទួលអនិច្ចធម្ម នៅថ្ងៃច័ន្ទ៩កើត ខែ អស្សុជ ឆ្នាំម្សាញ់ ឯកស័ក ព.ស ២៥៣៣ ត្រូវនឹងថ្ងៃទី៩ តុលា ឆ្នាំ ១៩៨៩ ដែលគិតមកដល់ពេលនេះមានរយៈពេល២៧ឆ្នាំហើយ៕
