គណៈប្រតិភូគណៈកម្មការ ទី៨ ព្រឹទ្ធសភា ដឹកនាំដោយលោកជំទាវ មាន សំអាន ប្រធានគណៈកម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និង កិច្ចការនារី ចំនួន ២០រូប បានអញ្ជើញមកបំពេញបេសកម្ម រយៈពេល ២ថ្ងៃ នៅខេត្តពោធិ៍សាត់ គឺនៅថ្ងៃទី ០១-០២ ខែ ធ្នូ ឆ្នាំ ២០១៥ ក្នុងគោលបំណងជួបពិភាក្សាជាមួយក្រុមប្រឹក្សា គណៈអភិបាល ដើម្បីស្តាប់របាយការណ៍សកម្មភាព នៃការអនុវត្តការងារ ប្រចាំឆ្នាំ២០១៥ និង លើកទិសដៅបន្ត នៅសាលប្រជុំសាលាខេត្តពោធិ៍សាត់ ។
ជាមួយគ្នានោះ ប្រតិភូបានសិក្សាឈ្វេងយល់ ការអនុវត្តការងារ របស់មន្ទីរសុខាភិបាល មន្ទីរការងារ មន្ទីរសង្គមកិច្ច មន្ទីរកិច្ចការនារី និង អង្គការក្រៅរដ្ឋាភិបាល ដែលអនុវត្តការងារពាក់ព័ន្ធ ទៅនឹងវិស័យសុខាភិបាល ព្រមទាំងបន្តទៅកាន់ស្រុកវាលវែងបន្តទៀត ដើម្បីជួបពិភាក្សាជាមួយមន្ត្រីមណ្ឌលសុខភាពប្រម៉ោយ ក្រុមប្រឹក្សា គណៈអភិបាលស្រុក និង ប្រជាពលរដ្ឋចាស់ជរា ចំនួន ៣០គ្រួសារផងដែរ ។
